Siunissami meeqqat inuusuttullu ilinniagaqalernissaannut tunngaviliinissamut qulakkeerinneqataanissamut peqataarusuppit? Ullut ingerlaartut suliatigut assigiinngitsunik unammillernartunik sammisaqarfiusut iluarisarpigit?Allanngueqataanermilu peqataarusuppit? Taamaappat pisariaqartippatsigit.
Qeqertarsuup Atuarfia pisortamik eqeersimaartumik akisussaassuseqartumillu pissarsiorpoq 01. januar 2026-imi imaluunniit isumaqatigiissuteqarnikkut sulilertussamik.
Qeqertarsuup Atuarfia atuarfiuvoq angivallaanngitsoq 110 missaanik atuartulik 21-nik ilinniartitsisulik.
Pisortap akisussaaffii pingaarnerit:
-Atuarfiup aqunneqarnerani inatsisit, nalunaarutit assigisaallu pisussaaffiliisut malillugit ingerlatsineq
-Meeqqat inuusuttuaqqallu atuartinneqarneranni ineriartortitsinissamik pitsanngorsaanissamillu ingerlaavartumik suleriuseqarneq
-Sulisunut aqutsineq, ilitsersuineq siunnersuinerlu
Pisortap suliassai akisussaaffiilu:
-Sulisunik aqutsineq
-Meeqqat inuusuttuaqqallu atuartinneqarnerisa pitsaasuunissaat avatangiiserinnissaat atungassarinnissaallu
-Meeqqat inuusuttuaqqallu pingaarnerpaatillugit aqutsineq anguniagaqarluarnerlu
-Ukiup atuarfiusup ingerlanerani pilersaarutit malillugit ingerlatsinerit
-Atuarfiup ilua tamakkerlugu isigalugu anguniakkanik peqataatitsinikkut ingerlaavartitsineq
-Sulisut, atuartut, angajoqqaat atuarfiullu siulersuisui suleqatigalugit ineriartortoqartuarnissaanut siuttuuneq
-Anguniakkanik ersarissunik peqatigiinnikkut ingerlaqatigiinnikkut nuannersumik suleqatigiilluni ingerlaqatigiisitsineq
-Immikkoortortanik allanillu suleqateqarnerup ineriartortuarlunilu pitsaasuunissaa
-Atuarfiup pisussaaffii malillugit avataaniittunik suleqateqarnerit ingerlanneri ilutigalugit pitsaasuullutillu ineriartorfiusut peqataaffiginissaat
Qinnuteqartumut naatsorsuutigineqarput:
-Ilinniartitsisutut ilinniagaqartuunissat
-Atuarfimmik aqutsinermik misilittagaqartuunissat aqutsisutullu ilinniarsimanissat
-Sulisunik aqutsinermik misilittagaqarlutillu pædagogiskimik allaffissornikkullu suliassanut ilisimasaqarlutillu soqutiginnittuunissat
-Atuarfimmik aqutsinermi ersarissuunissat akisussaassuseqarluartuunissallu
-Meeqqanut angajoqqaanullu akisussaaqatigiilluni ataatsimoorussaqalernermik peqataatitsinikkut piginneqatiginninnermik anguniagaqartuunissat
-Ineriartortitsinissamik angusarissaarnissamillu pingaartitsisuussasutit
-Eqeersimaartuunissat uummaarillutillu anguniagaqallaqqissuunissat
-Sulisunut maligassiuillutillu kaammattuillaqqissuunissat
-Meeqqat atuarfiat pillugu inatsit nalunaarutillu isumaqatigiissutinillu ilisimasaqartuunissat
-Programminik, Trio, Tabulex TEA, Skemalægning aamma skoleintra, atuarfiup iluani atorneqartunik atuisinnaanissat
-Kalaallisut qallunaatullu oqaaseqartuunissat
Atorfiup qaninnertut aqutsisoraa Qeqertarsuarmi INUIT aqutsisoq.
Akissarsiat atorfininnermilu atugassarititaasut Naalakkersuisut Ilinniartitsisut Meeqqat Atuarfianeersut Kattuffiata IMAKillu il.il. akornanni isumaqatigiissut atuuttoq 27. august 2014 –meersoq kiisalu Isumaqatigiissut pingaarneq / Hovedaftale 28. oktober 1998 –meersoq Naalakkersuisut Ilinniartitsisut Meeqqat Atuarfianneersut Kattuffiat, IMAK –illu isumaqatigiissutaat atuuttoq naapertorlugu.
Inissaq:
Atorfimmut atatillugu inissamik innersuussisoqarsinnaavoq, tassungalu qularnaveeqqut, ineqarnermut akiliutit, atuineq il.il. akilerneqartassapput, Kalaallit Nunaanni Namminersorlutik Oqartussat Kommunit il.il. inissiaataanni najugalinnik ineqarnermut akiliuteqartitsisarneq pillugu malittarisassat sukkulluunniit atuuttut naapertorlugit. Atorfimmut atatillugu inissiamik ataavartumik atorfinitsitaanerup kinguninnguagut attartorneqartussamik attartortitsisoqarsinnaanngippat, sulisut utaqqiisaasumik ineqarsinnaatitaasut, utaqqiisaasumik inissaannik neqeroorfigineqassapput, tassungalu ineqarnermut, atuinermut il.il. qulaani taaneqartoq innersuussutigalugu akiliuteqartoqassaaq. Ineqarnermut akiliutit pillugit annertunerusumik paasisaqarniaraanni, atuineq il.il. ilanngullugit uunga innersuussisoqarpoq: ini@ini.gl.
Erseqqissaatigineqassaaq atorfinitsinneqarnerup uppernarsarneqarnerata kinguninnguatigut ingerlaannartumik initaarnissaq pisinnaanngissinnaammat, inissarli pissarsiarineqarpat nuuttoqarsinnaalluni/ atorfinittoqarsinnaalluni. Malittarisassat atuuttut malillugit atorfininnermi angalanermut akiliussisoqassaaq aamma pequtit assartorneqarnerat akilerneqassaaq.
Atorfininnermi atugassarititaasut allat soorlu atorfininnermi angalaneq pisattallu angallanneri akiliunneqassapput, atorfininnermi Namminersorlutik Oqartussat Ilinniartitsisut Meeqqat Atuarfianneersut Kattuffiat, IMAKip akornanni isumaqatigiissutaasut atuuttut naapertorlugit.
Qinnuteqartut Kalaallit Nunaanni tjenestemanditut atorfimminngaanneersut taama atorfeqartitaanertik attatiinnassavaat.
Meeqqanik pinerliisimannginnermut aammalu pineqaatissinneqarsimannginnermut uppernarsaat:
Atorfik taanna meeqqanik pinerliisimannginnermut aamma pineqaatissinneqarsimannginnermut uppernarsaammik piumasaqaateqartussaatitaaneq pillugu inatsit naapertorlugu uppernarsaatinik piumasaqaateqarfiuvoq. Inatsit naapertorlugu kommune uppernarsaatinik naammaginartutut isigineqartunik pereerpat atorfininneq aallartinneqarsinnaavoq. Taamaattumik malugeqqussavarput kommunep uppernarsaatit naammaginartutut isigineqartut, meeqqanik pinerliisimannginnermut uppernarsaat rigspolitinit, aammalu pineqaatissinneqarsimannginnermut uppernarsaat politinit pippagit atorfininnissaq inissinneqassammat.
Meeqqanik pinerliisimannginnermut uppernarsaat kommunemit aaneqassaaq pineqartumit akuersissuteqarnikkut, pineqaatissinneqarsimannginnermullu uppernarsaat nammineq illoqarfigisami politiqarfimmut aaneqassaaq.
Atorfik pillugu paasissutissanik pissarsisoqarsinnaavoq Ando Møller INUIT aqutsisoq Kommune Qeqertalik Qeqertarsuaq, oqarasuaat +299 70 19 00 e-mail: ando@qeqertalik.gl attaveqarfingalugu.
Qinnuteqarneq:
Qinnuteqaatinik mail-ikkut allakkatigullu tigusineq ajorpugut.
Qinnuteqaatit nassiuguk, CV ilinniarsimanermut pikkorissarsimanermut uppernarsaatit, kiisalu oqaaseqaatit assigisaallu.
”Atorfik una qinnuteqarfigiuk” toorlugu ikkunneqassapput.
Qinnuteqaatit nassiunnerini ajornartorsiuteqaruit hr@qeqertalik.gl attavigiuk.
Qinnuteqaatissat tigunissaanut qilanaaraarput.
Qinnuteqarnissamut killissarititaasoq: decembarip 10.-at, 2025